Нэгэн Ар Монгол залуугийн Өвөр Монголчууддаа илгээсэн захиа

Саяхан Бээжингийн хотын төвийн хөл хөдөлгөөн, хоол унд элбэгтэй нэгэн өргөн чөлөөнд Bar Mongolia гэсэн хаягийг олж үзэв. Англи хаягтай ч Монгол бичгээр Бөртэ Чинуа хэмээн таталбар (calligraphy) бичжээ. Хажуугаар нь өнгөрөхдөө сонирхож цонхоор нь шагайтал менежер залуу нь хоромхон зуур гарч ирээд "Морилоод гар" хэмээн урив. Нэг их том биш талбайд 2 давхар болгож тагталсан баар ажиллуулж байгаа юм байна. Хамт явсан андтайгаа орж нэг нэг Tsingtao захиалав. Хэсэг газар хэдэн өвөр монголчууд, бас өөр нэг ширээнд хэдэн (ар) монголчууд суужээ. Тайзан дээр морин хуур, товшуур, бас даралтат хөгжим тоглоно. Өвөр монголчууд ээлж ээлжээр гарч ирж янз бүрийн аялгуугаар монгол дуу дуулна. Хоёр л удаа караокэ орж үзсэн тул арай өөр караокэ юм аа даа гэж бодов. Урьд сонссон дуу байхад огт сонсоогүй, бас үгийг нь ойлгох аргагүй олон дуу байв. Ихэвчлэн монголоор, заримдаа хятадаар, үе үе ганц нэг англи үг хавчуулж дуулж, ярилцаж байв. Их л эелдэг, илт царайчлангуй үйлчлэх Өвөр монгол залуугийн сэтгэлийг мэдрээд, сэтгэлээ нээн талын монгол дуугаа аялгуулан суугаа холын холын хамаатнуудаа харахад яагаад ч юм сэтгэлийн гүнд гуниг төрсөн билээ. Цахим өртөө сүлжээгээр өвөр монголчуудын тухай олон зүйл уншдаг, Швед Мөрөнгийн нийтлэлүүдийг уншдаг байж билээ. 10 жил болсон энэ сүлжээнд орон шоронд ороод гарсан олон ч баатаруудын тухай уншиж, АНУ-д амжилттай ажиллаж амьдарч буй, бас хувьсгалч хэд хэдэн залуустай танилцах завшаан ч гарч байв. Эдгээр тэмцэгчид дунд тагнуулууд байсны нэг нь одоо Канадын христийн сүмд бүгж буй ар монгол. 2007 онд Цахим өртөөгөөр ирсэн нэг өвөр монголын захианд хариу болгож имэйл бичиж билээ. Энэ захиа латин үсгээр бичигдсэн ч Өвөр монголын нэлээд олон сайтад өвөр монголчууд тавьсан байхыг нэг танил маань хараад дээхнэ надад дуулгасан билээ. Би ч гайхсангүй, яагаад гэвэл өвөр монголчууд ар монголчууд бид тэдний талаар юу бичиж, юу хэлж байгааг бид тэднийг юу хэлж байгаагаас илүү анхааралтай ажиглаж, өөрсдөдөө тусгаж авч байдгийг би олон удаа анзаарсан. Энэ удаа би энэ имэйлийг крилл үсгээр буулгаад блогтоо тавьлаа. Мэдээж би Өвөр Монголд очиж байгаагүй ч миний үзэл бодол 2007 оноос хойш бараг л өөрчлөгдөөгүй болно. Гэхдээ энэ зун Өвөр Монгол руу аялна. Бүр зориуд тийшээ очиж үзмээр байгаа юм. Тэр үед юу олж мэдсэнээ та бүхэнтэй хуваалцамз. Email recovered from: http://club.book.sohu.com/r-history-445450-0-5-0.html

From: D.Sainbayar
To: Цахим Өртөө Сүлжээ
Date: April 12, 2007
Subject: Нэгэн Ар Монгол залуугийн Өвөр Монголчууддаа илгээсэн захиа

Эвий хөөрхий Өвөр Монголчууд минь!!!

Хувь заяаны төөрөг түүхийн туршид Монголчууд бидэнд тийм ч зөөлөн хандаагүй буюу. Тэртусмаа өнөө цагт их Хятад гүрний колончилолд буй Өвөр Монголын нутагт төрсөн Монгол цусны тасархай чиний хувь заяа юутай өрөвдөм, юутай эмгэнэлтэй. Энэ хорвоод ямар ч амьд амьтан өөрийнхөө EXISTENCE, ТЭНГЭРЛЭГ ОРШИХУЙН төлөө амьдардаг билээ л... Олныг эс нуршин, өөрт бодогдож явдаг ганц хоёр бодлоо сийрүүлсү.

Та бүгдэд нэг бол Монгол руу цагаачлахыг бодох, эс бөгөөс Баруунд гарч амьдрах, бүр эс бөгөөс хүчирхэг Хятадад сайн уусч, тэндээ шингэх (олон хүн дургүйцэж магад... гэхдээ л хойч үе нь бага зовох болов уу) гурван арга зам байна гэж мунхаг би бодном.

Хамгийн сүүлийн хувилбар бол хамгийн эцсийн арга байж болох... Энэ бол таны ертөнцийг үзэх философиос хамаарна. Та амьдралыг сайхан хоол идэж, гэр бүлтэй болж, сайн машин унаж, сайхан байшинд амьдрахаар л төсөөлдөг бол, миний зөвлөгөө гэвэл: Улам бүр хүчирхэгжиж буй Хятадад сайн уус. Ар Монгол энээ тэрээ гэж бүү санаа зов. Амиа л сайн авч явахыг бод. Хэрэв та Хятадад төрсөндөө, Өвөр Монголын Өөртөө Засах Оронд төрсөндөө гунидаг, чин зүрх тань эх Монголынхоо төлөө цохилдог бол дээрх арга зам бол мэдээж таньд таарахгүй байж таараа. Гэхдээ л хүчтэйн өмнө хүчгүй нь буруутай байдаг тул Хадаа, Тэгшээ гэх мэт баатарлаг нөхдийн адил дэмий шахуу тэмцэл хийж тэдний араас шоронд бүү орогтун. Шоронд өнгөрөөсөн 10, 20 жилд хэн ч юу ч үл олж долооно.

Түүний оронд баруунд гарч ажил хий, мөнгөтэй бол, юм үзэж нүд тайл, дараа нь Ар Монголдоо очиж сайхан амьдар.

Монголд очиж хууль бусаар амьдарч ч болно. Танд тэгэх бүрэн эрх бий. Яагаад гэвэл та монгол цустай Монгол хүн учраас тэр. Америкад байгаа 20,000 Монголчуудын бараг 60 хувь нь хууль бусаар амьдардаг. Японд ч ялгаагүй, Англид ч мөн тийм байгаа. Тэгэхээр өвөг дээдсийнхээ нутагт ирж буй та бүгд эл улсуудад тархсан Монголчуудаас илүү дархан эрхтэйгээр Монголд хууль бусаар оршин суух эрхтэй агаад таныг Ар Монголчууд харин хөөхгүй байх болов уу гэж битүүхэндээ горьдож байна. (Хятад ажилчид ихэссэн өнөө үед та бүгдийг хөөнө гэдэг бүр ч утгагүй хэрэг)

Эрх чөлөөнд умбасан Ар Монголчууд хаа сайгүй харийнхантай суух нь элбэгшиж байгаа тул та бүгд ч гэсэн гадныхантай суух асуудал дээр тун нээлттэй хандагтун. Угаасаа ч цаг үе өөр болсон, Хятад хүнтэй л биш бол хэнтэй ч суух нь хамаагүй болж байгаа юм биш үү?

Америкийн Нэгдсэн Улсад хэлний курс, аялал, эсвэл ямар нэгэн төрлийн визээр ирэхийг бод! Ирсэн даруйдаа анхныхаа жилд та political asylum статус буюу УЛС ТӨРИЙН ОРОГНОЛ авах эрхтэй бөгөөд улс орныхоо нэрийг баастаж, хар амиа бодож, АНУ-ын засгийн газарт илт худлаа ярьж улс төрийн орогнол хүсч буй олон Ар Монголчуудын хажууд та бүгд үнэн ёсоор улс төрийн орогнол хүсэх эрхтэй ард түмэн гэдгээ сайн санаарай. Нэгэнт та бүгдийн эмгэнэлт түүхийг дэлхий мэдэх тул АНУ энэрэл хайрандаа авах л болно.

Ер нь шударга хэлэхэд Ар Mонголчууд та нарыг нэг их тоохгүй ээ, тооё гээд ч бидэнд тийм чадал байхгүй одоогоор. Тэд бие биеэ хүндэтгэн хайрлахдаа тун тааруу тал руугаа, чадал мөхөс улс. Хүн амын насанд хүрсэн иргэдийн 10% буюу 200 орчим мянга нь гадагшаа гараад явчихсан, тэртусмаа нийгмийн хамгийн бүтээмж сайтай иргэд нь шүү. Үлдсэн хүн амын 40% нь албан ёсны ядуучууд. 30% орчим хувь нь бол албан ёсны тоонд ордоггүй ядуучууд хөөрхий. Тэгээд үлдсэн дундаж ба түүнээс дээш давхаргын багахан хувь дунд төрийн албанд алба хашиж буй "түшмэд" гэж бий.

Тэд гадны улс орнуудаас нүүр улайн байж гуйж олсон мөнгөө зориулах юманд нь зарахгүйгээр ичих ч үгүй дундаас нь мөлжиж амь зуудаг бас их сонин нөхдүүд. За тэгээд гадаадад гарсан 10%, Монголдоо ажил албатай, бас түүнээ үнэнч шударгаар хийдэг 20% хүмүүс байна даа. Үлдсэн хэсэг нь архи уудаг, ажилгүй. Аа тийм, хорвоо ертөнцөөс тасраад хэдэн зуун жил болж буй нөгөө малчин ардын заримыг нь би энд шингээсэн байгаа. Нөгөө эхний 2 бүлэгт. Сумын төвийн эрчүүд ажил хийдэггүй гэх юм билээ.

Ер нь Америк руу цагаачлахыг л бодвол сайн даа. Хятадуудын гар дор зовж, сэтгэлийн гүнд шархтай, хувь тавиландаа гомдож явахаар дэлхийн зовсон, дарлагдсан ардыг эргээсээ хөөгөөгүй Эллис аралд саатан морилж, Эрх чөлөөний аралд ихийг хийж бүтээж, дэлхийн стандартаар амьдарч, Дэлхийн иргэн болсугай!

Бидний элэг нэгт Өвөр Монголчууд та бүгд өөрсдийгөө л сайн хөгжүүлэгтүн! Нэгэн цагт та бүгд Ар Монголдоон дураар нисэн бууж, эрх чөлөөтэйгээр амьдрах үе ирэх буюу. Тэр болтол бидний дээр суусан төр орвонгоороо эргэхийг хүлээ. Бидэнд 10 жилийн хугацаа л хэрэгтэй! Тэр болтол бэлтгэлтэй бай. "Fortune favors the prepared mind" буюу "Бэлтгэгдсэн оюyныг aзын тэнгэр ч илүүтэй харж үздэг" гэж нэг үнэн үг бий шүү.

Чин сэтгэлээс өчсөн Ар Монгол хүмүн би,

Д.Сайнбаяр 2007.04.12 (Цахим Өртөө Сүлжээнд илгээв)

Жич: яарч бичсэнийг минь өршөөнө үү.